هو الشباب بيهرب من البلد ليه ( موضوع للنقاش )

السلام عليكم ورحمة الله وبركاته
اخوانى وأخواتى اعضاء شباب الجيل فى موضوع اعتقد ان الكل سمع عنه وقرى عنه وشاف برامج كتير اتكلمت عنه
والموضوع هو هجرة الشباب سواء شرعية أو غير شرعية
انا حبيت اطرح الموضوع لانى بجد عايز احط ايدى على السبب الرئيسى فى الموضوع ده
ايه الى ورا هجرة الشباب كده ايه الى يخلى شباب ترمى نفسها فى التهلكة بانها تسافر تهريب ونسبة وصولها اصلا تكاد تكون 10 %
ايه الى يخلى احد الناس ابنه مات غريق والشخص الى كان المفروض يسفر ابنه بيردله الفلوس يقوله لاء خليها وسفر التانى
ياترى السبب هو الفقر ؟؟
ولا السبب هو البطالة ؟؟
ولا السبب هو الحكومة الى واقفة عاجزة قدام كل ده ؟؟
ولا كل دى مجتمعه مع بعض هى الاسباب ؟؟
ولا فى اسباب تانية انا معرفهاش
مستنى ردودكم وأرائكم

الموضوع ده مهم جدا وفي منتهي الخطورة
انا يمكن سالت نفسي في فترة من الفترات سؤال زي ده
ملقيتش غير اجابة واحدة ودي الاكيدة
بيحاول كل شاب بناء مستقبله بالعمل
فى أى وظيفة للحصول علي عائد مادى جيد يستطيع من خلاله أن يملك شقة
ويتزوج ويؤمن حياته ولكن التنفيذ صعب، والتفاصيل مرعبة
ومن هنا يبدا يفكر في السفر لخارج البلاد وبالطبع مالم يجده لتحقيق حلمه في بلده سوف يجده في بلاد اخري مما يضطره للاستقرار فيها ويترك وطنه ودايما هنسمع منه كلمة هي كانت بلدي دي عملتلي ايه عشان ارجعلها والله حال شبابنا مؤسف جدا ربنا يعينهم ويسرلهم امورهم
لكن هرجع وااقول ان البلد دي فيها شغل كتير مش شرط تشتغل بشهادتك دلوقتي اشتغل اي حاجة دور هتلاقي لانك لما تسافر بره اكيد برده مش هتشتغل بشهادتك هتشتغل اي حاجة وكل حاجة
ميرسي جدا علي المووضع ده وليا عودة ان شاء الله
منتظرة باقي الاراء ،