حتى ابليس زهق !!!!!!!!!!!!!!!!!!!!!

على باب سفارة كندا ..

لمحت إبليس وفى إيده إستمارة ..

بقول له على فين ..

قاللى بص ..يا هجرة يا إعارة

يا عم زهقت .. كفرت

ألاقيش معاك سيجارة
أنا انتهيت خلاص
لا نافع وسواس ولا خناس

ولا ليا عيش وسط الناس

دى عالم مجرمين
عندكوا فائض فى الفساد

فى كل البلاد

ومش محتاجين شياطين
مليش عيش فى البلد دى

بقالى سنين عاطل

وانتو بتعرفوا

تقلبوا الحق باطل

وتمشوا فى جنازة القتيل
وتسلكوا القاتل

ومفيش مشاكل

ياعم ده أنا بقيت أوسوس بالمقلوب

وأقول للحرامى كفاية بقى

انت مش هتوب
يعنى إنت هاتعمل كل الذنوب لوحدك

وأنا إبليس
أشتغل واعظ

ولا كمسارى فى أتوبيس
ياعم ده أنا زمان
كنت أستني حد ينسى يسمى
وهو بياكل لقمته
دلوقتى كل أكلكم ملوث

وبصراحة الواحد خايف على صحته ..

ده مفيش ضمير أساسا ..

عشان أموته ..وكل واحد بمزاجه ..

خربانه ذمته ..

يا راجل ده من كتر ما لطشت معايا ..خرجت ف مظاهرة ..

مع الناس اللى بتقول كفايه ..

وبرضة مفيش فايدة ..